Емануела Ковачевска Китановска

Емануела Ковачевска Китановска е родена на 05.02.2002 во Скопје. Студира психологија на МИТ Универзитет во Скопје. Авторка е на стихозбирката „Кожена душа“ (без ISBN) за која ја освои наградата „Антев часовник“ во 2019 година на манифестацијата „Антево перо“. Со ракописот „Второ детство“ влезе во најтесен избор за наградата „Антев часовник“ за 2023 г., што се доделува на нови млади талентирани поети што творат на македонски јазик, на манифестацијата „Антево перо“. Добитничка е на наградата „Најмлада поетска искра“ на Меѓународниот фестивал „Литературни Искри“ во 2019 година во Гостивар. Нејзините песни се застапени во неколку антологии и има објавувано текстови во списанието „Современост“ во рубриката „Sвезди и Протези“. Има учествувано на работилници, поетски читања и фестивали, меѓу кои се: Астални Проекции, Поетска ноќ во Велестово, Поетска епизода – Култура Бета, Скопски поетски фестивал, Џифони, Коронијалс, Македонски театарски фестивал во Прилеп, ,,PSICOLOGIA” - конференција за психологија и психоанализа во Франција. Организаторка е на проектот „Камера Обскура“ - иницијатива која го истражува македонското женско поетско писмо. Во соработка со Градската библиотека „Браќа Миладиновци“ во Скопје, во рамки на кампањата „Читаме современи автори“, беше модератор на некои од читателските клубови. Организатор е на независниот фестивал за култура и уметност „Коронијалс“ (досега две изданија) и има организирано неколку поетски читања во Скопје. Пишува проза, дел од расказите ѝ се застапени во збирката „Мали приказни за Скопје“ (Скопје: Просветно Дело, 2019). Се занимава со театар и драматургија, има напишано и изведено две монодрами „Драг Вардар“ во МКЦ и „Sвездан“ во Домот на Култура „Кочо Рацин“ и претставата ,,Постојам” под менторство на Теа Беговска и Миа Кантарџиева во Скопје. Го зборува, пишува, чита и разбира францускиот јазик и во слободно време свири на мандолина.