Алеш Мустар

Алеш Мустар е роден 1968 год. во Љубљана, Словенија. Дипломирал англиски јазик и педагогија на универзитетот во Љубљана, а докторирал од областа на романската драматургија на универзитетот во Букурешт, Романија. Преведува од романски и македонски јазик и важи за еден од најдобрите промотори на македонската книжевност на словенечки јазик. Се занимава и со театар. Во 2005 год. според негов текст во Љубљана беше поставена алтернативната претстава без актери „16 вртежи“. Пишува поезија и објавува во периодиката. Неговата поетска книга „(Суд)бин(ско) толкување“ излезе во 2005 год. и беше номинирана за најдобра дебитантска книга. „Блесок“ ја објави на македонски јазик во 2007 година. Наскоро ќе биде објавена во препев на англиски јазик во САД. Неговите песни се препеани на англиски, чешки, српски, македонски и романски јазик.