Елизабета Линднер Костадиновска

Елизабета Линднер Костадиновска e литературна преведувачка, интердисциплинарна уметница, повеќејазична поетеса, уредничка на книжевни изданија, основач на порталот и издавачката куќа СловоКулт, главен и одговорен уредник на истоименото двојазично списание, и уметнички директор на фестивалот за современи уметности СловоКулт :: литерАРТура. Родена е во Скопјe во 1971 година. Дипломирала германски јазик и книжевност на Филолошкиот факултет „Блаже Конески“ при Универзитетот „Свети Кирил и Методиј“ (2001), студирала Современа германска литература и Славистика на факултетите во Дрезден (ДААД стипендија 1999 – 2000) и Регенсбург, каде што магистрирала во 2005 година. По специјалниот курс за културен менаџмент, од 2006 година се преселува во Берлин, каде што живее и работи. Пишува поезија уште од тинејџерски години. Првите раскази ги пишува во деведесеттите, но не ги објавува – по иселувањето во Германија во 2001 година почнува интензивно да се занимава со германска книжевност, па затоа последниве години пишува поезија и куса проза претежно на германски јазик и сама ги преведува на македонски, или обратно.