Љубица Шопова

Љубица Шопова (1985) е родена во Скопје. Дипломирала и магистрирала на Економскиот факултет во родниот град. Пишува поезија и статии од областа на бихевиоралната економија. Во 2020 година ја објавува својата прва збирка поезија „Форми во создавање“ во издание на „ПНВ Публикации“. Учествувала на меѓународниот поетски фестивал „Литературни искри“ во Гостивар, каде нејзините песни се најдоа во потесен избор од десетте најдобри учесници. Во 2023 година беше една од учесниците на 35. издание на фестивалот „Поетска ноќ во Велестово“. Настапила и на неколку поетски читања низ Македонија, меѓу кои: „Астални проекции“, „Бела ноќ“, „Поетска епизода“ и „Добри гости“ во Тетово, како и „Овде паѓаат крупни зборови“ во рамките на книжевниот фестивал „Друга приказна“. Нејзината поезија е застапена во списанијата: „Современост“, „Книжевни елементи“, „Акт“, во неколку електронски списанија, како и во арт-панорамата „Допир“. Редовно со свои песни е дел од манифестацијата „100 000 поети за промена“. Застапена е и во „Самодиви: панорама на македонската поезија пишувана од жени, од преродбата до денес“, и во други печатени и онлајн антологии. Нејзините стихови се преведени на српски јазик. „Надвор од единиците мерки“ (2025) е нејзина втора збирка поезија, во издание на Илика.