Надвор од единиците мерки
Колку тежи човек над она што е
крв, месо и коски?
Што кажуваат зборовите
што не се запишани во ниту еден запис?
Постои ли концентрација на полен што
ќе ги натера да кивнат аквариумските риби?
Може ли да се измери
сѐ што не се гледа со голо око?
Тела со сета сила растргнати
надвор од единиците мерки.
Будење
Болка
борка
слобода.
Чекор
исчекор
патека.
Патоказ
подрачје
сигнал.
Потсетник
аларм
будилник.
Еден ден сакам само
да се разбудам.
Лет
Како хипнотизирана болка
што лебди над телото
по испиен парацетамол,
една птица на небото
летајќи
ја менува формата на облаците.
Ден, месец, година
На денешен датум ја напишав
годината на раѓање.
Можеби одново се родив
или се преродив
или само сакам нов почеток.
Можеби сум родена
за некое друго време
или постојам надвор од него.
Имам пеперутки во стомакот
и мајски бумбари во главата.
Ги местиме стрелките на часовникот
синхронизирано.
Се разминуваме точно навреме.
Приземјување
Го растргнувам телото
на неколку фронтови
како едро на брод кој плови
до места избришани од мапите.
Без топоними и координати
се вкотвувам во точката
во која се приземјуваат
одлетаните зборови
