Марјан Анѓеловски
Модерни, свежи и актуелни афоризми кои успеваат да останат прецизни и добри. Играта на зборови е само дополнителен квалитет.
- Да живееш во Македонија е закон. Марфиев закон.
- Не се сите тендери наместени. Некои сè уште се местат.
- Речиси сите влегоа во Европа. Ама ние не сме со сите!
- Не е точно дека нашите политичари немаат идеи. Имаат луди идеи!
- Ми ја наполнија главата дека ми е празна.
- Нè чека подобро утре. Ама не знаеме каде нè чека.
- Се заљубив во Скопје. Има тука некаква хемија во воздухот.
- Македонија е света земја. Сите се крстат кога ќе ја видат.
- Беше лојален орган во партијата. Сега живее како бубрег во лој.
- Беше левоориентиран, а потоа стана десноориентиран. Сега е дезориентиран.
- Секој е невин додека не се докаже дека е член на опозицијата.
- Пишував лошо за власта. Лошо ми се пишува.
- Во нашиот фудбал сè е на место. Дури и натпреварите се наместени.
- За да не го одерат, скапо си ја продаде кожата.
- Македонскиот народ е среќен. Што е жив!
- Сè додека ни солат памет ќе немаме ни за сол.
- Оваа власт уште долго ќе живее во нашите мисли. Такви сме, злопамтила.
- Власта успеа да ни обезбеди некои елементарни работи. Елементарни непогоди, на пример.
- Македонија е најстара земја на светот. Ама светот на младите останува.
- Во Македонија мора да си политички обоен. Или си плав од ќотек или си црвен од срам.
- Државата ни е презаситена од гладни.
- Многу сакам да живеам. Умирам за тоа.
- Смртта ја дочека мртов ладен.
- Ако ти лета паметот, ќе ти летне и главата.
- Ноќна мора? Тоа е ноќта кога мора да ја слушаш жена ти.
- Ни сме народ на место. Ама на погрешно место.
Марјан Анѓелковски е роден 1987 година во Скопје. Пишува и настапува низ земјава и Балканот со хумор, сатира и стенд-ап комедија. Неговите афоризми досега се објавувани во списанијата „Остен“, „Јеж“, „Носорог“, „Макс Минус“, „Шипак“, „Пулс 24“ и други весници, списанија и електронски портали низ Балканот. Застапен е и во неколку антологии на балканскиот и македонскиот афоризам.
