Во збиените редови мора да има згмечени.
За да живееш како бог треба да си ѓавол.
Пред расипаниот нос трендафилот е рамноправен со изметот.
Ми пружија шанса дури откако заврши натпреварот.
Бунтовниот дух на свињата може да убие со корито помија.
Кога рајот и пеколот се блиску, разликата меѓу боговите и ѓаволите е мала.
Калта под ноктите не е доказ за другарување со плугот.
И најголемиот математичар може да се изгуби во брачен триаголник.
Само кога е облачно слонот и глушецот имаат исти сенки.
Ако е животот училиште, јас сакам да повторувам.
И колата на историјата понекогаш е натоварена со тикви.
За обичниот човек некрологот е излез од анонимноста.
Пред да му дадат збор му ги зедоа мислите.
Дождот паѓа на секого, а накиснува само некого.
Повеќето расветлени случаи се темни.
Понекогаш е подобро да си кретен, отколку конкретен.
За некои не е сè лошо, туку ништо не е добро.
Да знаел за директори народот во минатото не ќе пеел за ламји.
Некогаш ги полнеа гаќите, денес штедните книшки.
И во огнот на револуциите некои печат јагниња.
Прво ги сечеме стеблта в корен, а потоа чекаме да раззеленат.
Некогаш и кога се тресат глупости паѓаат одлуки.
Едни се вртат во круг, други се онесвестуваат.
Кога општеството е буниште, „петлите“ имаат главен збор.
Софе Штерјоски (1949-1984) бил новинар на Радио Скопје, како и еден од најпознатите македонски хумористи и сатиричари, и автор на повеќе книги за деца. Изборот од дваесетина афоризми е земен од неговата книга „Силни слабости“ од 1973 година.
Скулптури: Марк Квин
